हिंद दी चादर: गुरु नानक नामलेवा संगत अन् सिख को-ऑर्डिनेशन कमिटीचा ऐतिहासिक पुढाकार; महाराष्ट्रात सामाजिक एकतेची नवी पहाट!

हिंद दी चादर: गुरु नानक नामलेवा संगत अन् सिख को-ऑर्डिनेशन कमिटीचा ऐतिहासिक पुढाकार; महाराष्ट्रात सामाजिक एकतेची नवी पहाट!

लोकमंच टाईम्स | विशेष प्रतिनिधी (हरनामसिंग चव्हाण)

मुंबई / नांदेड:
महाराष्ट्र शासनाच्या अल्पसंख्याक विभागाच्या विशेष सहकार्याने ‘गुरु नानक नामलेवा संगत’ आणि ‘सिख को-ऑर्डिनेशन कमिटी’ (तखत सचखंड श्री हजूर साहिब, नांदेड पंचप्यारे साहिबान) यांच्या संयुक्त विद्यमाने आयोजित ‘हिंद दी चादर’ या महासोहळ्याने महाराष्ट्राच्या सामाजिक इतिहासात एक सुवर्ण अध्याय लिहिला आहे. राज्यातील विविध समाजांना एकाच छताखाली आणि एकाच व्यासपीठावर आणण्याचा हा क्रांतिकारी प्रयोग केवळ यशस्वीच ठरला नाही, तर या उपक्रमाने संपूर्ण महाराष्ट्रात सामाजिक सलोखा आणि अभूतपूर्व एकतेची लाट निर्माण केली आहे.
लाखोंचा जनसागर अन् एकतेचा जयघोष
या ऐतिहासिक महासोहळ्यात सिख, सिकलीगर, बंजारा, लबाना, सिंधी, मोहियल, वाल्मिकी आणि बिजनोरी यांसह गुरु नानक देवांच्या विचारांवर निष्ठा असणाऱ्या तमाम बहुजन व शोषित समाजबांधवांनी एकत्र येत एकतेचा बुलंद संदेश दिला. राज्यातील तीनही प्रमुख कार्यक्रमांमध्ये गुरु नानक नामलेवा संगतीच्या उत्कृष्ट नियोजनामुळे लाखोंच्या संख्येने भाविकांनी हजेरी लावली आणि भक्तिमय वातावरणात गुरुचरणी माथा टेकवला. प्रत्येक घटकाला मिळालेला समान सन्मान आणि संधी यामुळे सर्व समाजबांधवांमध्ये प्रचंड उत्साह व समाधानाचे वातावरण पाहायला मिळाले.
नेतृत्वाची वज्रमूठ रामेश्वरजी नाईक आणि संत बाबा हरनामसिंग जींचे ऐतिहासिक योगदान
विभक्त झालेल्या आणि उपेक्षित राहिलेल्या विविध घटकांना एकाच धाग्यात गुंफण्याचे कठीण कार्य लबाना समाजाचे वंशज व समाज समन्वयक श्री रामेश्वरजी नाईक, दमदमी टकसाळचे प्रमुख संत बाबा हरनामसिंग जी भिंडरावाले आणि तखत हजूर साहिब पंचप्यारे साहिबान यांच्या कणखर नेतृत्वामुळे शक्य झाले. त्यांच्या दूरदृष्टी आणि खंबीर मार्गदर्शनामुळे समाज एकत्र आलाच, शिवाय “आज, उद्या आणि भविष्यातही आम्ही एकमेकांच्या पाठीशी खंबीरपणे उभे राहू!” असा ठाम निर्धार हजारो बांधवांनी या मंचावरून व्यक्त केला.
तळागाळातील कार्यकर्त्यांना थेट दिल्ली-मुंबईच्या मंचावर स्थान!
गुरु नानक नामलेवा संगत आणि सिख को-ऑर्डिनेशन कमिटी ही केवळ कार्यक्रमांपुरती मर्यादित न राहता, शोषितांच्या हक्कासाठी ढाल बनून उभी राहणारी संघटना ठरली आहे. जिथे अन्याय होतो, तिथे हे पदाधिकारी रस्त्यावर उतरून संघर्ष करतात. सर्वात महत्त्वाचे म्हणजे, ग्राउंड लेव्हलवर प्रामाणिकपणे काम करणाऱ्या तळागाळातील कार्यकर्त्यांना थेट राज्य (मुंबई) आणि केंद्रीय (दिल्ली) पातळीवरील सर्वोच्च मंचांवर सन्मानाचे स्थान मिळवून देण्याचे अभूतपूर्व कार्य या संस्थांनी केले आहे.

“सुखा-दुःखात पाठीशी खंबीरपणे उभे राहतात, तेच खरे समाजसुधारक!”
या उक्तीचा जिवंत प्रत्यय आज दोन्ही संस्थांच्या कार्यातून येत आहे. समाजाचा गौरवशाली इतिहास जपत भविष्यातील उज्ज्वल सुधारणांसाठी हे नेतृत्व अविरत कार्यरत आहे.

या ऐतिहासिक सोहळ्याच्या अभूतपूर्व यशामुळे गुरु नानक नामलेवा संगत आणि सिख को-ऑर्डिनेशन कमिटीने आज महाराष्ट्रातील प्रत्येक घटकाच्या आणि नागरिकाच्या मनात विश्वासाचे अन् हक्काचे स्थान निर्माण केले आहे.