वसमत नगरपरिषदेच्या भूखंड घोटाळ्याविरोधात बेमुदत लक्ष वेद्धी आंदोलन सुरू

वसमत नगरपरिषदेच्या भूखंड घोटाळ्याविरोधात बेमुदत लक्ष वेद्धी आंदोलन सुरू

वसमत (लोकमंच टाईम्स प्रतिनिधी):
वसमत नगरपरिषदेच्या सर्वे नं. १८० मधील मालकीच्या भूखंडांचे बनावट दस्तऐवज तयार करून परस्पर विक्री केल्याचा गंभीर प्रकार उघडकीस आला आहे. या घोटाळ्यातील भू-माफिया, दुय्यम निबंधक व नगरपरिषदेच्या दोषी अधिकाऱ्यांवर तात्काळ गुन्हे दाखल करून मकोकाअंतर्गत कारवाई करावी, यासह विविध मागण्यांसाठी ‘अखिल भारतीय भ्रष्टाचार निर्मूलन संघर्ष समिती’च्या वतीने उपविभागीय अधिकारी (SDO) कार्यालयासमोर बेमुदत आंदोलन सुरू करण्यात आले आहे.
नगरपरिषदेच्या रेकॉर्डमध्ये बेकायदेशीर फेरफार करून लाखो रुपयांचे भूखंड लाटल्याचा आरोप आंदोलकांनी केला आहे. प्रशासनाने दिशाभूल करणारी फिर्याद न देता मुख्य सूत्रधारांवर गुन्हे दाखल करावेत, अशी मागणी जिल्हा उपाध्यक्ष आनंद खरे आणि मुनीरोद्दीन फारुकी यांनी केली असून, मागण्या मान्य न झाल्यास तीव्र आंदोलनाचा इशारा दिला आहे.