वसमतच्या राजकीय इतिहासात सुवर्णपान: ७४ वर्षांनंतर पहिल्यांदाच बौद्ध समाजाला उपाध्यक्षपद; राजू येंगडे यांची बिनविरोध निवड आणि नवघरे पवारांचा मास्टरस्ट्रोक!

वसमतच्या राजकीय इतिहासात सुवर्णपान: ७४ वर्षांनंतर पहिल्यांदाच बौद्ध समाजाला उपाध्यक्षपद; राजू येंगडे यांची बिनविरोध निवड आणि नवघरे पवारांचा मास्टरस्ट्रोक!

लोकमंच टाईम्स:हरनामसिंग चव्हाण

विशेष राजकीय आणि सामाजिक विश्लेषण
वसमत नगर परिषदेच्या १९५२ मधील स्थापनेपासून तब्बल ७४ वर्षांच्या प्रदीर्घ इतिहासात जो बहुमान कुणाला मिळवता आला नाही, तो ऐतिहासिक राजकीय अध्याय अखेर लिहिला गेला आहे. पडद्यामागील नाट्यमय घडामोडी, गटनेते सचिन दगडूंचा राजकीय ‘स्टेप बॅक’ आणि लोकमंच टाईम्सच्या एक्सक्लुझिव्ह बातमीवर उमटलेले अधिकृत शिक्कामोर्तब यानंतर वसमत नगर परिषदेच्या उपाध्यक्षपदी राजू येंगडे यांची बिनविरोध निवड झाली आहे.
स्वातंत्र्योत्तर काळापासून आजवर वसमतच्या स्थानिक राजकारणात वंचित आणि उपेक्षित राहिलेल्या बौद्ध समाज बांधवांना पहिल्यांदाच नगर परिषदेच्या दुसरं सर्वोच्च मानल्या जाणाऱ्या उपाध्यक्षपदाचा बहुमान मिळाला आहे.
राजकीय व सामाजिक घडामोडींचा प्रमुख घटनाक्रम
इतिहास घडला (१९५२ ते २०२६): ७४ वर्षांच्या राजकीय प्रवासात पहिल्यांदाच बौद्ध समाजातील नेतृत्वाला वसमत नगरपालिकेत उपाध्यक्षपदाची धुरा सोपवण्यात आली.
सचिन दगडूंचा ‘स्टेप बॅक’ आघाडीवर असूनही ऐनवेळी सचिन दगडू यांनी माघार घेत पक्षांतर्गत सहकार्याचा आदर्श वस्तुपाठ घालवून दिला.
आमदार राजूभैय्या नवघरे यांचा मास्टरस्ट्रोक: स्थानिक लोकप्रतिनिधी आमदार राजूभैय्या नवघरे यांनी राजकीय गणितांपेक्षा सामाजिक न्यायाला प्राधान्य देत येंगडे यांच्या नावावर अंतिम मुहर उमटवली.
बिनविरोध निवड विरोधकांचे सर्व डावपेच निष्प्रभ ठरल्याने राजू येंगडे यांची निवड बिनविरोध झाली.
नवे प्रशासकीय समीकरण: नगराध्यक्ष सौ. सुनीताताई मनमोहन बाहेती आणि उपाध्यक्ष राजू येंगडे यांच्या जोडीमुळे शहराच्या विकासाला नवी गती मिळण्याची चिन्हे आहेत.
सामाजिक क्रांती आणि जल्लोषाचे वातावरण
येंगडे यांच्या बिनविरोध निवडीची घोषणा होताच वसमत शहरासह संपूर्ण तालुक्यात उत्सवाचे वातावरण निर्माण झाले आहे. “अखेर समाजाला योग्य न्याय मिळाला” अशी भावना व्यक्त करत चौकाचौकांत फटाक्यांची आतषबाजी, गुलालाची उधळण आणि मिठाई वाटून जल्लोष साजरा करण्यात आला.
“हा केवळ एका पदाचा बहुमान नसून, सर्वसमावेशक राजकारणाचा विजय आहे. आमदार राजूभैय्या नवघरे यांनी दाखवलेला राजकीय दूरदृष्टिकोनामुळेच बौद्ध समाजाला हा ऐतिहासिक न्याय मिळू शकला.”
— स्थानिक नागरिक व समाजबांधव

राजकीय विश्लेषण ‘नवघरे पॅटर्न’ आणि वसमतचे नवे राजकारण
वसमतच्या राजकारणात हा निर्णय केवळ एका निवडीपुरता मर्यादित नसून याचे दूरगामी राजकीय परिणाम होणार आहेत. गटनेत्यांची समजूत काढण्यापासून ते विरोधकांना निष्प्रभ करेपर्यंत आमदार राजूभैय्या नवघरे यांनी खेळलेली ही ‘गनिमी काव्याची’ राजकीय खेळी अत्यंत यशस्वी ठरली आहे.
एकीकडे पक्षांतर्गत असंतोष वेळेत शमवून सत्ताधाऱ्यांनी आपली पकड घट्ट केली आहे, तर दुसरीकडे सामाजिक समतोल साधत तळागाळातील घटकाला सत्तेच्या मुख्य प्रवाहात आणून ‘सर्वसमावेशक नेतृत्वाचा’ दाखला दिला आहे. राजू येंगडे यांचा दांडगा प्रशासकीय आणि स्थानिक जनसंपर्क पाहता, येणाऱ्या काळात नगरपालिकेच्या कारभारात मोठी सुधारणा दिसेल यात शंका नाही.