वसमत नगरपरिषदेच्या मुख्याधिकाऱ्यांना नगरसेवक ॲड. दीपक कट्टेकर यांचे निवेदन: प्रभाग ११ मधील नागरी समस्या तातडीने सोडवण्याची मागणी

वसमत नगरपरिषदेच्या मुख्याधिकाऱ्यांना नगरसेवक ॲड. दीपक कट्टेकर यांचे निवेदन: प्रभाग ११ मधील नागरी समस्या तातडीने सोडवण्याची मागणी

वसमत ( प्रतिनिधी लोकमंच टाईम्स ):

वसमत नगरपरिषद हद्दीतील प्रभाग क्रमांक ११ मधील अस्वच्छता, तुंबलेल्या नाल्या, डासांचा वाढता प्रादुर्भाव आणि मुख्य चौकातील धोकादायक खड्ड्यांसंदर्भात नगरसेवक ॲड. दीपक रमेशराव कट्टेकर यांनी वसमत नगरपरिषदेचे मुख्याधिकारी यांना ५ ऑगस्ट २०२६ रोजी निवेदन देऊन तातडीने उपाययोजना करण्याची मागणी केली आहे.
नागरिकांच्या वाढत्या तक्रारींची दखल घेत नगरसेवक ॲड. कट्टेकर यांनी निवेदनाद्वारे प्रभागातील खालील प्रमुख समस्यांकडे प्रशासनाचे लक्ष वेधले आहे:
१. कचऱ्याची समस्या व दंडात्मक कारवाई: माळवटकर यांच्या घराजवळील वीज वितरण ट्रान्सफॉर्मर (DP) परिसरात रोज कचरा टाकला जात असल्याने प्रचंड दुर्गंधी पसरत आहे. त्यामुळे येथे नियमित कचरा उचलण्यात यावा आणि कचरा टाकणाऱ्यांवर दंडात्मक / योग्य कारवाई करण्यात यावी.
२. नाल्यांची साफसफाई: प्रभागातील नाल्यांमधील गाळ व कचरा वेळेवर न काढल्यामुळे पावसाळ्यात नाल्यांचे पाणी रस्त्यावर येत आहे. याचा मोठा त्रास ज्येष्ठ नागरिक, महिला, लहान मुले व वाहनधारकांना सहन करावा लागत आहे.
३. डास प्रतिबंधक फवारणी: साचलेल्या पाण्यामुळे प्रभागात डासांचे प्रमाण वाढले असून डेंग्यू, मलेरिया व इतर साथीच्या आजारांचा धोका निर्माण झाला आहे. यासाठी संपूर्ण प्रभागात तातडीने डास प्रतिबंधक औषध फवारणी करण्यात यावी.
४. रस्त्यांची दर्जेदार दुरुस्ती: प्रभाग ११ मधील मुख्य चौकात पडलेला मोठा खड्डा बुजवण्यासाठी केवळ चुरी टाकण्यात आली होती, जी पावसाच्या पाण्यामुळे वाहून गेली आहे. हा रस्ता शाळकरी विद्यार्थी, पालक व नागरिकांच्या रोजच्या वर्दळीचा असल्याने अपघाताचा गंभीर धोका निर्माण झाला आहे. त्यामुळे या खड्ड्याची कायमस्वरूपी व दर्जेदार दुरुस्ती करण्यात यावी.
नागरिकांचे आरोग्य आणि सुरक्षितता लक्षात घेता नगरपरिषदेने या सर्व बाबींची गांभीर्याने दखल घेऊन त्वरित कार्यवाही करावी, अशी ठाम मागणी नगरसेवक ॲड. दीपक कट्टेकर यांनी केली आहे.