मतदार याद्यांचा विशेष सखोल पुनरीक्षण कार्यक्रम सुरू; ८ ऑगस्टपर्यंत गणना अर्ज सादर करण्याचे मुख्य निवडणूक अधिकाऱ्यांचे आवाहन

मतदार याद्यांचा विशेष सखोल पुनरीक्षण कार्यक्रम सुरू; ८ ऑगस्टपर्यंत गणना अर्ज सादर करण्याचे मुख्य निवडणूक अधिकाऱ्यांचे आवाहन

मुख्यसंपादक: हरनामसिंग चव्हाण

मुंबई:
महाराष्ट्र राज्यामध्ये मतदार याद्यांच्या विशेष सखोल पुनरीक्षणाचा (Special Intensive Revision) कार्यक्रम सुरू झाला आहे. या कार्यक्रमांतर्गत सध्याच्या मतदार यादीतील सर्व मतदारांनी ८ ऑगस्ट २०२६ पर्यंत आपले गणना अर्ज पूर्ण भरून व स्वाक्षरी करून गृहभेटीस येणाऱ्या संबंधित बी.एल.ओ. (BLO – मतदान केंद्रस्तरीय अधिकारी) यांच्याकडे जमा करणे आवश्यक आहे, असे प्रसिद्धीपत्रक मुख्य निवडणूक अधिकारी कार्यालयाकडून जारी करण्यात आले आहे.
महत्त्वाच्या तारखा आणि टप्पे:
८ ऑगस्ट २०२६: गणना अर्ज भरून बी.एल.ओ. (BLO) कडे जमा करण्याची अंतिम तारीख.
१७ ऑगस्ट २०२६: प्रारुप (Draft) मतदार यादी प्रसिद्ध केली जाईल.
१७ ऑगस्ट ते १६ सप्टेंबर २०२६ (दावे व हरकतीचा कालावधी):
नवीन नाव नोंदणी: ज्यांची नावे प्रारुप यादीत नसतील किंवा जे नवीन मतदार आहेत, त्यांनी नमूना ६ (घोषणानपत्रासह) भरून द्यावा.
नोंदीमध्ये दुरुस्ती: नाव किंवा पत्ता दुरुस्तीसाठी नमूना ८ भरावा.
नाव वगळणे / हरकत: यादीतील कोणतीही नोंद वगळण्यासाठी नमूना ७ भरून हरकत घेता येईल.
१९ ऑक्टोबर २०२६ अंतिम मतदार यादी प्रसिद्ध केली जाईल.
⚠️ चुकीची माहिती दिल्यास १ वर्षाची शिक्षा!
मतदार यादीत नाव समाविष्ट करणे, सुधारणा करणे किंवा नाव वगळण्यासाठी अर्ज करताना चुकीची घोषणा किंवा विधान केल्यास, लोकप्रतिनिधित्व अधिनियम, १९५० च्या कलम ३१ नुसार संबंधित व्यक्तीस १ वर्षांपर्यंतची कैद, दंड किंवा दोन्ही शिक्षा होऊ शकते.
सतत अद्यतन प्रक्रिया (Continuous Updation)
निवडणूक कार्यालयाने स्पष्ट केले आहे की, लोकप्रतिनिधित्व अधिनियम, १९५० च्या कलम २२, २३ व २३(३) नुसार अंतिम मतदार यादी प्रसिद्ध झाल्यानंतरही नाव नोंदणी व सुधारणा ही निरंतर अद्यतन प्रक्रिया आहे. नागरिक कोणत्याही निवडणुकीसाठी नामनिर्देशन भरण्याच्या अंतिम दिनांकापर्यंत विहित नमूना क्र. ६ मध्ये अर्ज करून आपले नाव मतदार यादीत समाविष्ट करू शकतात.
आवाहन: सर्व पात्र नागरिकांनी व मतदारांनी वेळेत आपले अर्ज भरून नोंदणी पूर्ण करावी, असे आवाहन प्रशासनातर्फे करण्यात आले आहे.