नांदेड हादरले! सरदार इंद्रजीतसिंग बावरी हत्याप्रकरणाविरोधात सिकलगर समाज आक्रमक; हजारो सिख बांधवांचा भव्य आक्रोश मोर्चा

नांदेड हादरले! सरदार इंद्रजीतसिंग बावरी हत्याप्रकरणाविरोधात सिकलगर समाज आक्रमक; हजारो सिख बांधवांचा भव्य आक्रोश मोर्चा

नांदेड:
८ ऑगस्ट २०२६ रोजी नांदेड शहरात घडलेल्या स्व. सरदार इंद्रजीतसिंग बलजीतसिंग बावरी यांच्या निर्घृण आणि पूर्वनिोजित हत्येचे पडसाद आता संपूर्ण महाराष्ट्रात उमटू लागले आहेत. या धक्कादायक घटनेमुळे नांदेड जिल्ह्यासह संपूर्ण सिकलगर समाजात संतापाचा तीव्र उद्रेक झाला आहे. या अमानुष हत्येतील आरोपींवर कठोर प्रशासकीय व न्यायालयीक कारवाई व्हावी, या मागणीसाठी सकल सिकलगर समाजाच्या वतीने जिल्हाधिकारी कार्यालयावर भव्य आक्रोश मोर्चा काढण्यात आला.
गुरुद्वारा हुजूर साहिब येथून अरदास करून मोर्चाची सुरुवात
आक्रोशाने पेटून उठलेल्या हजारो सिकलगर सिख बांधवांनी सर्वप्रथम पवित्र श्री गुरुद्वारा हुजूर साहिब सचखंड येथे एकत्र येऊन न्यायासाठी अरदास (प्रार्थना) केली. त्यानंतर या ऐतिहासिक आक्रोश मोर्च्याला सुरुवात झाली. हातात निषेधाचे फलक आणि अन्यायाविरोधात जोरदार घोषणाबाजी करत हजारो बांधवांचा हा जनसागर थेट जिल्हाधिकारी कार्यालयावर धडकला. तिथे समाजातर्फे जिल्हाधिकाऱ्यांना आपल्या न्याय्य मागण्यांचे निवेदन सादर करण्यात आले.
सकल सिकलगर समाजाच्या प्रमुख व कडक मागण्या:
उच्चस्तरीय SIT चौकशी: या हत्येमागे असलेला संपूर्ण गुन्हेगारी कट, त्यातील पडद्यामागचे सूत्रधार आणि नेटवर्कचा पर्दाफाश करण्यासाठी तात्काळ उच्चस्तरीय विशेष तपास पथकाची (SIT) स्थापना करावी.
MCOCA (मकोका) अंतर्गत कारवाई व मालमत्ता जप्ती: मुख्य आरोपी १) नितीन बिगानीया व २) किना परदेशी यांच्यासह या गुन्ह्यात सामील असलेल्या इतर सर्व आरोपींवर संघटित गुन्हेगारीविरोधी ‘मकोका’ (MCOCA) कायद्यानुसार कारवाई करण्यात यावी आणि त्यांची सर्व अवैध मालमत्ता शासनाने तात्काळ जप्त करावी.
फास्ट ट्रॅक कोर्ट व फाशीची शिक्षा: हा खटला फास्ट ट्रॅक (जलदगती) न्यायालयात चालवून आरोपींना लवकरात लवकर मरेपर्यंत फाशीची (मृत्युदंड) शिक्षा सुनावण्यात यावी.
कुटुंब व साक्षीदारांना तात्काळ पोलीस संरक्षण: मयताचे वडील बलजीतसिंग भगवानसिंग बावरी, त्यांचे संपूर्ण कुटुंब आणि या प्रकरणातील मुख्य साक्षीदारांच्या जीवाला धोका असल्याने त्यांना तातडीने कडक पोलीस संरक्षण पुरवण्यात यावे.
आंदोलनाचा गंभीर इशारा
नांदेडमधील बिघडलेली कायदा-सुव्यवस्था आणि सामान्य नागरिकांच्या सुरक्षेचा गंभीर प्रश्न उपस्थित करत समाजबांधवांनी या घटनेचा अत्यंत तीव्र शब्दांत निषेध नोंदवला. जर प्रशासनाने या मागण्यांची तातडीने दखल घेऊन आरोपींवर कठोर पावले उचलली नाहीत, तर येत्या काळात यापेक्षाही तीव्र आणि व्यापक आंदोलन छेडले जाईल, असा स्पष्ट इशारा सकल सिकलगर समाजाच्या वतीने देण्यात आला आहे.