वसमतजवळील पोलका येथील प्रगतीशील शेतकरी गंगाधर जोगदंड यांचा नाविन्यपूर्ण प्रयोग: करवंद शेतीतून मिळवले भरघोस यश!

वसमतजवळील पोलका येथील प्रगतीशील शेतकरी गंगाधर जोगदंड यांचा नाविन्यपूर्ण प्रयोग: करवंद शेतीतून मिळवले भरघोस यश!

वसमत (लोकमंच टाईम्स विशेष प्रतिनिधी):

वसमत :पारंपरिक शेतीला फाटा देत आधुनिक आणि नावीन्यपूर्ण पिकांची कास धरल्यास शेतीतूनही उत्तम उत्पन्न मिळू शकते, हे वसमत शहरापासून अवघ्या ३ ते ४ किलोमीटर अंतरावर असलेल्या पोलका येथील प्रगतीशील शेतकरी गंगाधर सुभाषराव जोगदंड यांनी सिद्ध करून दाखवले आहे. त्यांनी आपल्या पोलका शिवारातील गट क्रमांक २० मधील दोन एकर शेतजमिनीत केलेला करवंद लागवडीचा प्रयोग सध्या परिसरात कौतुकाचा विषय ठरत आहे.
दोन वर्षांतच करवंदाची बंपर आवक
गंगाधर जोगदंड यांनी १२ जून २०२४ रोजी आपल्या दोन एकर क्षेत्रात नियोजनबद्ध पद्धतीने करवंदाची लागवड केली होती. योग्य संगोपन, सेंद्रिय खतांचा वापर आणि वेळेवर केलेल्या व्यवस्थापनामुळे अवघ्या दोन वर्षांच्या कालावधीतच झाडांना भरपूर फळधारणा झाली आहे.
बाजारपेठेत मागणी; ४० ते ४२ रुपये प्रति किलोचा दर:
सध्या बाजारात करवंदाला मोठी मागणी असून आजघडीला जोगदंड यांच्या करवंदाची ४० ते ४२ रुपये प्रति किलो याप्रमाणे उत्तम दराने विक्री होत आहे. कमी पाण्यात आणि कमी खर्चात येणाऱ्या या पिकातून त्यांना अल्पवधीतच चांगला आर्थिक दिलासा मिळाला आहे.
इतर शेतकऱ्यांसाठी ठरले प्रेरणास्थान
हवामानातील बदल आणि पारंपरिक पिकांमधील अनिश्चितता लक्षात घेता, गंगाधर जोगदंड यांनी घेतलेला हा निर्णय अत्यंत धाडसी आणि फायदेशीर ठरला आहे. पोलका आणि वसमत परिसरातील अनेक शेतकरी त्यांच्या या यशस्वी प्रयोगाला भेट देऊन करवंद शेतीची माहिती घेत आहेत.
“शेतकऱ्यांनी केवळ पारंपरिक पिकांवर अवलंबून न राहता बाजारपेठेची मागणी ओळखून फळबागांकडे वळले पाहिजे,” असा संदेश प्रगतीशील शेतकरी गंगाधर जोगदंड यांनी या प्रयोगाच्या माध्यमातून दिला आहे. त्यांच्या या उल्लेखनीय यशाबद्दल परिसरातून त्यांच्यावर कौतुकाचा वर्षाव होत आहे.