वसमत नगर परिषदेच्या उपनगराध्यक्षांचा राजीनामा; निष्पक्ष चौकशीची गटनेते सचिन दगडू यांची मागणी

वसमत नगर परिषदेच्या उपनगराध्यक्षांचा राजीनामा; निष्पक्ष चौकशीची गटनेते सचिन दगडू यांची मागणी

लोकमंच टाईम्स मुख्य संपादक: हरनामसिंग चव्हाण

वसमत (प्रतिनिधी):
वसमत नगर परिषदेचे उपनगराध्यक्ष श्री. सय्यद इम्रान अली यांनी आपल्यावरील आरोपांच्या पार्श्वभूमीवर नैतिक जबाबदारी स्वीकारत उपनगराध्यक्ष पदाचा राजीनामा दिला आहे. या निर्णयाची दखल घेत, नगर परिषदेचे गटनेते तथा नगरसेवक सचिन विठ्ठल दगडू यांनी या संपूर्ण प्रकरणाची निष्पक्ष आणि पारदर्शक चौकशी करण्याची स्पष्ट भूमिका मांडली आहे.
या संदर्भात लोकमंच टाईम्स पत्रकारांशी बोलताना माहिती दिली गटनेते सचिन दगडू यांनी सांगितले की, “आमचा पक्ष आणि आमचे नेते नेहमीच कायद्याच्या राज्यावर विश्वास ठेवतात. उपनगराध्यक्षांवरील आरोपांच्या पार्श्वभूमीवर कोणत्याही राजकीय किंवा इतर दबावाशिवाय या प्रकरणाची सखोल चौकशी व्हावी, ही आमची ठाम भूमिका आहे. सत्य काय आहे ते जनतेसमोर आलेच पाहिजे आणि कायद्यानुसार योग्य ती कारवाई झाली पाहिजे.”
त्यांनी पुढे नमूद केले की, तपास पूर्ण होण्यापूर्वी कोणालाही दोषी ठरवणे अयोग्य आहे. आमचा देश, न्यायव्यवस्था आणि तपास यंत्रणांवर पूर्ण विश्वास आहे.
नगर परिषदेच्या कामकाजाबाबत बोलताना सचिन दगडू यांनी नागरिकांना आश्वस्त केले की, या घडामोडींचा वसमत नगर परिषदेच्या विकासकामांवर कोणताही परिणाम होऊ दिला जाणार नाही. नागरिकांचे प्रश्न, शहरातील विकासकामे आणि लोकसेवा यांनाच आमचे सर्वोच्च प्राधान्य असेल. कायद्याचा सन्मान करणे, प्रशासनात पारदर्शकता ठेवणे आणि जनतेचा विश्वास टिकवून ठेवणे यासाठी आम्ही कटिबद्ध आहोत, असेही त्यांनी स्पष्ट केले.