‘पुण्यश्लोक अहिल्यादेवी होळकर कर्जमुक्ती योजने’ची e-KYC पूर्णपणे मोफत – सहकार आयुक्तांचे कडक आदेश!

‘पुण्यश्लोक अहिल्यादेवी होळकर कर्जमुक्ती योजने’ची e-KYC पूर्णपणे मोफत – सहकार आयुक्तांचे कडक आदेश!

हिंगोली (विशेष बातमी):

पुण्यश्लोक अहिल्यादेवी होळकर शेतकरी कर्जमुक्ती योजना २०२६ अंतर्गत पात्र शेतकऱ्यांची आधार e-KYC प्रक्रिया पूर्णपणे मोफत असून, कोणत्याही ‘आपले सरकार’ सेवा केंद्र किंवा ग्रामस्तरीय उद्योजकाने (VLE) शेतकऱ्यांकडून एक रुपयाही घेऊ नये, असे स्पष्ट व कडक निर्देश सहकार आयुक्त तथा निबंधक (सहकारी संस्था, महाराष्ट्र राज्य, पुणे) यांनी दिले आहेत.
नियमित कर्ज परतफेड करणाऱ्या पात्र शेतकऱ्यांना या योजनेचा लाभ दिला जात असून, त्यासाठी e-KYC करणे अनिवार्य आहे. या प्रक्रियेसाठी लागणारे मानधन राज्य शासन थेट VLE च्या खात्यात जमा करणार आहे. त्यामुळे शेतकऱ्यांकडून शुल्क आकारण्याचा प्रश्नच उद्भवत नाही, असे प्रशासनाने स्पष्ट केले आहे.
सहकार आयुक्तांच्या प्रमुख सूचना व निर्देश
सेवा केंद्रांवर फलक अनिवार्य राज्यातील प्रत्येक सेवा केंद्राच्या दर्शनी भागात “e-KYC सेवा शेतकऱ्यांसाठी पूर्णतः विनामूल्य आहे” असा ठळक फलक लावणे बंधनकारक करण्यात आले आहे.
पैसे मागितल्यास कठोर कारवाई कोणत्याही VLE किंवा सेवा केंद्राने e-KYC साठी पैसे मागितल्याची तक्रार आल्यास त्यांच्यावर नियमानुसार कडक कायदेशीर कारवाई केली जाईल.
प्रशासनाची करडी नजर जिल्हा व तालुका स्तरावर या प्रक्रियेवर बारीक लक्ष ठेवण्याचे आणि शेतकऱ्यांवर आर्थिक भार पडणार नाही याची दक्षता घेण्याचे आदेश यंत्रणेला देण्यात आले आहेत.
शेतकऱ्यांना आवाहन e-KYC ही प्रक्रिया १००% मोफत आहे. कोणत्याही केंद्र चालकाला पैसे देऊ नयेत! जर कोणी शुल्काची मागणी केली, तर तत्काळ संबंधित तहसील कार्यालय, जिल्हाधिकारी कार्यालय किंवा सहकार विभागाकडे तक्रार नोंदवावी.

हा संदेश आपल्या सर्व शेतकरी बांधवांपर्यंत नक्की पोहोचवा आणि जागरूक राहा!