मराठवाडा मुक्ती संग्राम दिनी वसमतमध्ये आमदार राजूभैय्या नवघरे यांचा धडाका: नूतन ‘मिटिंग हॉल’चे लोकार्पण; कोरड्या पडलेल्या पिकांसाठी ‘आजच’ केनॉलला पाणी सुटणार!

मराठवाडा मुक्ती संग्राम दिनी वसमतमध्ये आमदार राजूभैय्या नवघरे यांचा धडाका: नूतन ‘मिटिंग हॉल’चे लोकार्पण; कोरड्या पडलेल्या पिकांसाठी ‘आजच’ केनॉलला पाणी सुटणार!

लोकमंच टाईम्स (विशेष बातमी): हरनामसिंग चव्हाण,
वसमत
मराठवाडा मुक्ती संग्राम दिनाचे औचित्य साधून वसमत येथे विकासाचा आणि शेतकऱ्यांच्या हक्काचा असा दुहेरी धडाका पाहायला मिळाला! जिल्हा वार्षिक योजना (२०२५-२६) अंतर्गत तहसील कार्यालयात उभारण्यात आलेल्या अत्याधुनिक व सुसज्ज ‘मिटिंग हॉल’चा भव्य लोकार्पण सोहळा आमदार श्री. चंद्रकांत उर्फ राजूभैय्या नवघरे यांच्या हस्ते उत्साहात पार पडला.
मात्र, केवळ उद्घाटनापुरते मर्यादित न राहता आमदार नवघरे यांनी संकटात सापडलेल्या शेतकऱ्यांसाठी अत्यंत आक्रमक भूमिका घेत प्रशासनाला थेट धारेवर धरले.
प्रशासनाला दणका: पिकांच्या नुकसानीचे तात्काळ पंचनामे करा!
पावसाच्या ओढीमुळे शेतातील पिके डोळ्यादेखत करपून जात असून बळीराजा संकटात सापडला आहे. वीज आणि पाण्याच्या भीषण समस्येने शेतकऱ्यांचे कंबरडे मोडले असल्याबद्दल आमदार नवघरे यांनी तीव्र चिंता व्यक्त केली.
उपस्थित तहसीलदार श्री. सारंग चव्हाण यांना थेट निर्देश देत आमदार नवघरे म्हणाले, “सुकलेली पिके पाहून शेतकऱ्यांच्या वेदना सहन होत नाहीत. प्रशासनाने कोणत्याही प्रकारचा उशीर न करता तात्काळ शेतात जाऊन नुकसानीचे वस्तुनिष्ठ पंचनामे करावेत आणि बाधितांना शासन दरबारी भरघोस भरपाई मिळवून द्यावी!”
बळीराजाला मोठा दिलासा: “आजच केनॉलला पाणी सुटणार!”
या कार्यक्रमात आमदार नवघरे यांनी वसमतकरांना आणि विशेषत शेतकरी बांधवांना सर्वात मोठा आणि दिलासादायक शब्द दिला. “शेतकऱ्यांच्या पिकांना जीवदान देण्यासाठी आजच्या आजच केनॉलला पाणी सुटणार आहे!” अशी थेट ग्वाही त्यांनी दिली. आमदार नवघरे यांच्या या एकाच घोषणेने हवालदिल झालेल्या शेतकऱ्यांमध्ये आनंदाची लाट पसरली आहे.
वसमत नगर परिषदेच्या नूतन इमारतीचा दिला सल्ला
तहसीलच्या नूतन मिटिंग हॉलच्या धर्तीवर वसमत नगर परिषदेचाही कायापालट झाला पाहिजे, अशी आग्रही भूमिका त्यांनी मांडली. उपस्थित नगराध्यक्षा सौ. सुनीताताई मनमोहन बाहेती, उपनगराध्यक्ष श्री. राजकुमार ऐंगडे, गटनेते सचिन दगडू आणि सर्व नगरसेवकांना त्यांनी नगर परिषदेसाठी सुसज्ज नवीन इमारत उभारण्याचा मोलाचा सल्ला दिला.
प्रशासकीय अधिकारी व मान्यवरांची तुफान उपस्थिती
या सोहळ्याला लोकप्रतिनिधी आणि प्रशासकीय अधिकाऱ्यांची मोठी उपस्थिती लाभली होती
प्रमुख उपस्थिती आमदार श्री. चंद्रकांत उर्फ राजूभैय्या नवघरे
नगर परिषद पदाधिकारी सौ. सुनीताताई मनमोहन बाहेती (नगराध्यक्षा), श्री. राजकुमार रावण ऐंगडे (उपनगराध्यक्ष), सचिन दगडू (गटनेते) व सर्व सन्माननीय नगरसेवक
प्रशासकीय अधिकारी श्री. विकास माने (उपविभागीय अधिकारी), श्री. सारंग चव्हाण (तहसीलदार), श्री. सुरेश जोशी (कार्यकारी अभियंता, सा.बा. विभाग, हिंगोली), श्री. आशुतोष चिंचाळकर (मुख्याधिकारी)
इतर मान्यवर वसमत कृषी उत्पन्न बाजार समितीचे अध्यक्ष व संपूर्ण टीम, पत्रकार बांधव, शासकीय कर्मचारी आणि वसमतकर नागरिक मोठ्या संख्येने उपस्थित होते.