हिंगोलीचे जिल्हाधिकारी राहुल गुप्ता यांच्या नावाने ‘फेक’ फेसबुक अकाउंट; नागरिकांना सतर्क राहण्याचे आवाहन

हिंगोलीचे जिल्हाधिकारी राहुल गुप्ता यांच्या नावाने ‘फेक’ फेसबुक अकाउंट; नागरिकांना सतर्क राहण्याचे आवाहन

लोकमंच टाईम्स: हरनामसिंग चव्हाण

हिंगोली:
हिंगोलीचे जिल्हाधिकारी राहुल गुप्ता (IAS) यांच्या नावाने आणि फोटोचा वापर करून काही अज्ञातांनी सोशल मीडियावर बनावट (फेक) फेसबुक प्रोफाइल तयार केल्याचा प्रकार समोर आला आहे. या बनावट अकाउंटवरून नागरिकांना मेसेज पाठवून दिशाभूल करण्याचा प्रयत्न केला जात असून, नागरिकांनी अशा कोणत्याही आवाहनाला किंवा मेसेजला बळी पडू नये, असे आवाहन जिल्हा प्रशासनाकडून करण्यात आले आहे.
मिळालेल्या माहितीनुसार, सायबर गुन्हेगारांनी जिल्हाधिकारी राहुल गुप्ता यांच्या नावाचे हुबेहूब फेसबूक अकाउंट तयार केले आहे. या अकाउंटवर जिल्हाधिकाऱ्यांचे अधिकृत फोटो वापरून ते खरे असल्याचे भासवण्याचा प्रयत्न केला जात आहे. अशा बनावट खात्यांमधून नागरिकांना अथवा शासकीय कर्मचाऱ्यांना वैयक्तिक मेसेज पाठवणे, आर्थिक मागणी करणे किंवा संशयास्पद लिंक्स पाठवण्याचे प्रकार घडू शकतात.
हा प्रकार निदर्शनास येताच जिल्हा प्रशासनाने तातडीने याची दखल घेतली आहे. संबंधित बनावट फेसबुक प्रोफाइलबाबत सायबर पोलीस ठाण्यात तक्रार दाखल करण्याची प्रक्रिया सुरू करण्यात आली आहे.
प्रशासनाचे नागरिकांना आवाहन:
जिल्हाधिकाऱ्यांच्या नावाने आलेल्या कोणत्याही संशयास्पद मेसेजला उत्तर देऊ नका.
जर कोणाकडून पैशांची मागणी किंवा वैयक्तिक माहिती विचारली जात असेल, तर त्वरित ब्लॉक करा.
अशा प्रकारचा मेसेज आल्यास स्थानिक सायबर पोलीस स्टेशनशी संपर्क साधावा.
सोशल मीडियाचा वापर करताना नागरिकांनी खबरदारी बाळगावी आणि अफवा किंवा बनावट अकाउंट्सला बळी पडू नये, असे प्रशासनाकडून स्पष्ट करण्यात आले आहे.