वसमत येथे श्री बोधानंद गणेश मंडळाचा स्तुत्य उपक्रम: आरोग्य व सवलत कार्ड शिबिराला नागरिकांचा उत्स्फूर्त प्रतिसाद १६० जणांना आयुष्मान भारत, तर १५० नागरिकांना मिळाले एनसीएमसी कार्ड!

वसमत येथे श्री बोधानंद गणेश मंडळाचा स्तुत्य उपक्रम: आरोग्य व सवलत कार्ड शिबिराला नागरिकांचा उत्स्फूर्त प्रतिसाद
१६० जणांना आयुष्मान भारत, तर १५० नागरिकांना मिळाले एनसीएमसी कार्ड!

लोकमंच टाईम्स: हरनामसिंग चव्हाण

वसमत (विशेष प्रतिनिधी):
सामाजिक भान जपत जनसेवेचा वसा पुढे चालवणाऱ्या शहरातील मानाच्या श्री बोधानंद गणेश मंडळ (ब्राह्मण गल्ली) यांच्या वतीने आयोजित आरोग्य व सवलतीच्या कार्डांच्या विशेष शिबिराला वसमतकरांनी भरभरून प्रतिसाद दिला. या शिबिराच्या माध्यमातून एकाच छताखाली शासनाच्या महत्त्वपूर्ण लोककल्याणकारी योजनांचा लाभ मिळाल्याने तब्बल ३१० हून अधिक नागरिकांची मोठी सोय झाली आहे.
आरोग्य सुरक्षा व प्रवास सवलतीचा एकाच वेळी लाभ
शिबिरादरम्यान आरोग्यविषयक सेवांतर्गत ‘आयुष्मान भारत’ योजनेचे आयुष्मान कार्ड, ‘आभा’ हेल्थ आयडी कार्ड आणि ७० वर्षांवरील ज्येष्ठ नागरिकांसाठी अत्यंत महत्त्वाच्या ठरणाऱ्या ‘वय वंदना योजने’ची कार्डे मोफत काढून देण्यात आली. परिसरातील जवळपास १६० गरजू व ज्येष्ठ नागरिकांनी या आरोग्य कार्डांचा लाभ घेतला.
यासोबतच, दैनंदिन प्रवासात सवलत मिळवून देणाऱ्या MSRTC, Ebixcash व NSDL मान्यताप्राप्त NCMC (नॅशनल कॉमन मोबिलिटी) कार्डांचेही थेट वितरण करण्यात आले. सुमारे १५० प्रवाशांनी व नागरिकांनी या सुविधेचा फायदा घेतला.
तज्ज्ञ व कार्यकर्त्यांचे मोलाचे योगदान
हा भव्य उपक्रम यशस्वीरीत्या पार पाडण्यासाठी MPW प्रसनजीत दातार आणि सौ. मनीषा शिवचंद्र पत्रकर यांनी प्रशासकीय पातळीवर विशेष सहकार्य केले. मंडळाच्या पदाधिकाऱ्यांनी उत्कृष्ट नियोजन करत नागरिकांना कोणताही त्रास न होता सुलभरीत्या कार्ड मिळतील याची दक्षता घेतली.
कार्यक्रमाच्या यशस्वीतेसाठी मंडळाचे अध्यक्ष राजू पत्की, उपाध्यक्ष नितीन अंबेकर, सचिव आनंद औसेकर, कोषाध्यक्ष धनंजय मडके यांच्यासह मंडळातील सर्व युवा कार्यकर्त्यांनी अथक परिश्रम घेतले. या संपूर्ण उपक्रमाला आनंद बडवणे यांचे मोलाचे मार्गदर्शन लाभले.
गणेशोत्सवाच्या धार्मिक परंपरेला सामाजिक बांधिलकीची जोड देत श्री बोधानंद गणेश मंडळाने राबवलेल्या या जनहितार्थ उपक्रमाचे संपूर्ण वसमत शहरातून जोरदार कौतुक होत आहे.