९२-वसमत विधानसभा मतदारसंघात प्रारूप मतदार यादी प्रसिद्ध; एकूण २,९०,२२१ मतदारांची नोंद विशेष सखोल संक्षिप्त पुनरीक्षण (SIR) २०२६ अंतर्गत २७,७५९ नावे वगळली; ३० सप्टेंबरपर्यंत हरकती व दावे नोंदवण्याचे आवाहन

९२-वसमत विधानसभा मतदारसंघात प्रारूप मतदार यादी प्रसिद्ध; एकूण २,९०,२२१ मतदारांची नोंद
विशेष सखोल संक्षिप्त पुनरीक्षण (SIR) २०२६ अंतर्गत २७,७५९ नावे वगळली; ३० सप्टेंबरपर्यंत हरकती व दावे नोंदवण्याचे आवाहन

लोकमंच टाईम्स: हरनामसिंग चव्हाण

वसमत (विशेष बातमीदार):
भारत निवडणूक आयोगाच्या निर्देशानुसार विशेष सखोल संक्षिप्त पुनरीक्षण (SIR) २०२६ कार्यक्रमांतर्गत ९२-वसमत विधानसभा मतदारसंघाची प्रारूप मतदार यादी (Draft Electoral Roll) आज, ३१ ऑगस्ट २०२६ रोजी अधिकृतपणे प्रसिद्ध करण्यात आली आहे. घरोघरी जाऊन करण्यात आलेल्या सखोल पडताळणीनंतर मतदारसंघातील एकूण मतदारांची संख्या २,९०,२२१ झाली असून, मतदान केंद्रांचे सुसूत्रीकरण करून त्यांची संख्या ३२७ वरून ३३९ करण्यात आली आहे.
प्रारूप यादीची मुख्य वैशिष्ट्ये व आकडेवारी
पुनरीक्षण कार्यक्रम सुरू होण्यापूर्वी (१८ जून २०२६ रोजी) मतदारसंघात ३,१७,९७९ मतदार होते. सखोल पडताळणी प्रक्रियेनंतर आता मतदारसंघातील एकूण मतदारांची स्थिती खालीलप्रमाणे आहे:
एकूण मतदार: २,९०,२२१
पुरुष मतदार: १,५०,५५३
स्त्री मतदार: १,३९,६६४
तृतीयपंथी मतदार: ४
लिंग गुणोत्तर (Gender Ratio): ९२८ (दर हजार पुरुषांमागे स्त्री मतदार)
ज्येष्ठ नागरिक मतदार: ४,०१७ (१.३८%)
दिव्यांग (PwD) मतदार: २,१४६ (०.७४%) — (१,४३६ पुरुष, ७१० स्त्री)
२७,७५९ नावे वगळण्यामागची प्रमुख कारणे
पूर्वीच्या मतदार यादीच्या तुलनेत २७,७५९ मतदारांची (८.७३%) नावे प्रारूप यादीत समाविष्ट होऊ शकली नाहीत. त्यामागची कारणे खालीलप्रमाणे आहेत
मृत्यू झालेले मतदार ८,१५१ (२.५६%)
कायमस्वरूपी स्थलांतरित १३,५०९ (४.२५%)
स्थलांतरित / न सापडलेले ३,२०० (१.०१%)
आधीच अन्यत्र नोंदणीकृत २,८५७ (०.९०%)
इतर कारणे: ४२ (०.०१%)
नवमतदारांच्या नोंदणीबाबत स्पष्टीकरण
चालू SIR प्रक्रियेत १८ ते १९ वयोगटातील नवमतदारांच्या गणना प्रपत्रांची पडताळणी व नोंदणी प्रक्रिया अद्याप वेगाने सुरू आहे. त्यामुळे प्रारूप यादीत ही संख्या कमी दिसत असली तरी अंतिम मतदार यादी प्रसिद्ध होईपर्यंत यात मोठी सुधारणा अपेक्षित आहे.
मतदारांसाठी महत्त्वाचे वेळापत्रक व आवाहन
नाव तपासणी सर्व मतदारांनी आपले नाव, वय, पत्ता व इतर तपशील नजीकच्या मतदान केंद्रावर, तहसील कार्यालय वसमत येथे किंवा ECINET / निवडणूक आयोगाच्या संकेतस्थळावर तपासून पाहावे.
दावे व हरकतींचा कालावधी: ३१ ऑगस्ट २०२६ ते ३० सप्टेंबर २०२६ या कालावधीत विहित नमुन्यात संबंधित BLO (मतदान केंद्रस्तरीय अधिकारी) किंवा तहसील कार्यालयाकडे अर्ज सादर करता येतील.
अंतिम मतदार यादी प्रसिद्धी: प्राप्त सर्व दाव्यांची व हरकतींची पडताळणी करून ४ नोव्हेंबर २०२६ रोजी अंतिम मतदार यादी प्रसिद्ध केली जाईल.
“मतदारांनी या राष्ट्रीय महत्त्वाच्या कार्यक्रमात सक्रिय सहभाग नोंदवून आपल्या मतदार नोंदणीबाबत वेळीच खात्री करून घ्यावी.”
— विकास माने (मतदार नोंदणी अधिकारी, ९२-वसमत विधानसभा मतदारसंघ)