लिटल किंग्स इंग्लिश स्कूल व मुक्ताई विद्यालयात ‘लेखन प्रेरणा दिन’ व ग्रंथप्रदर्शन उत्साहात साजरा! साहित्यरत्न लोकशाहीर अण्णाभाऊ साठे यांच्या जयंतीनिमित्त शेकडो विद्यार्थ्यांनी घेतला वाचन-लेखनाचा संकल्प

लिटल किंग्स इंग्लिश स्कूल व मुक्ताई विद्यालयात ‘लेखन प्रेरणा दिन’ व ग्रंथप्रदर्शन उत्साहात साजरा!
साहित्यरत्न लोकशाहीर अण्णाभाऊ साठे यांच्या जयंतीनिमित्त शेकडो विद्यार्थ्यांनी घेतला वाचन-लेखनाचा संकल्प

लोकमंच टाईम्स
मुख्य संपादक: हरनामसिंग चव्हाण

वसमत:साहित्यरत्न लोकशाहीर अण्णाभाऊ साठे यांच्या जयंतीचे औचित्य साधून १ ऑगस्ट रोजी लिटल किंग्स इंग्लिश स्कूल आणि मुक्ताई विद्यालय, वसमत येथे विठाई सार्वजनिक वाचनालयाच्या संयुक्त विद्यमाने “लेखन प्रेरणा दिन” अत्यंत उत्साहपूर्ण वातावरणात साजरा करण्यात आला. या कार्यक्रमात शेकडो विद्यार्थ्यांनी उत्स्फूर्त सहभाग नोंदवून अण्णाभाऊंच्या प्रेरणादायी जीवनकार्याचा व विपुल वाङ्मयाचा परिचय करून घेतला.
प्रतिमा पूजनाने कार्यक्रमाची सुरुवात झाली. लोकशाहीर अण्णाभाऊ साठे यांच्या प्रतिमेस पुष्पहार अर्पण करून विनम्र अभिवादन करण्यात आले. त्यानंतर विद्यार्थ्यांना अण्णाभाऊंच्या संघर्षमय जीवनप्रवासाची, सामाजिक बांधिलकीची आणि त्यांनी मराठी साहित्यात निर्माण केलेल्या अढळ स्थानाची माहिती देण्यात आली.
अण्णाभाऊंचे साहित्य परिवर्तनाचे माध्यम: मान्यवरांचे प्रतिपादन
कार्यक्रमादरम्यान मार्गदर्शन करताना सांगण्यात आले की, औपचारिक शिक्षणाचा अभाव असतानाही केवळ जिद्द, अथांग प्रतिभा आणि अविरत लेखनाच्या बळावर अण्णाभाऊंनी मराठी साहित्याला जागतिक पटलावर पोहोचवले. समाजातील शोषित, वंचित, कष्टकरी व उपेक्षित घटकांचे वास्तव मांडून साहित्याला परिवर्तनाचे शस्त्र बनवणाऱ्या या महान साहित्यिकाचा जन्मदिन म्हणूनच संपूर्ण राज्यभर ‘लेखन प्रेरणा दिन’ म्हणून साजरा केला जातो.
विठाई वाचनालयाचे ग्रंथप्रदर्शन ठ ठरले आकर्षण
या प्रसंगी विठाई सार्वजनिक वाचनालयाच्या वतीने अण्णाभाऊ साठे यांच्या प्रसिद्ध साहित्यकृतींचे विशेष ग्रंथप्रदर्शन भरवण्यात आले होते. यामध्ये:
‘वारणेचा वाघ’, ‘माझा रशियाचा प्रवास’, ‘स्मशानातलं सोनं’, ‘चित्र’, ‘मंगला’, ‘रत्ना’, ‘अहंकार’, ‘आघात’, ‘संघर्ष’, ‘रूपा’, ‘आग’, ‘रानबोका’, ‘फुलपाखरू’ यांसह निवडक साहित्यकृतींच्या खंडांचा समावेश होता.
विद्यार्थ्यांनी या पुस्तकांचे उत्सुकतेने अवलोकन केले. पुस्तकांची व्याप्ती, सामाजिक मूल्ये आणि लेखनाची ताकद समजून घेत अनेक विद्यार्थ्यांनी भविष्यात ही पुस्तके सविस्तर वाचण्याचा व स्वतः लिहिते होण्याचा संकल्प केला.
विद्यार्थ्यांनी विचार मांडून लिहिते व्हावे: शाळा प्रशासनाचे आवाहन
लिटल किंग्स इंग्लिश स्कूल आणि मुक्ताई विद्यालयाच्या वतीने विद्यार्थ्यांना आवाहन करण्यात आले की, “वाचनाने विचार समृद्ध होतात आणि लेखनातून व्यक्तिमत्त्व घडते. प्रत्येक विद्यार्थ्यामध्ये एक सर्जनशील लेखक व विचारवंत दडलेला असतो. अण्णाभाऊंच्या विचारांतून प्रेरणा घेऊन विद्यार्थ्यांनी नियमित वाचनाची सवय जपावी आणि आपले विचार मांडायला शिकावे. विद्यार्थी बोलते आणि लिहिते झाले, तरच या लेखन प्रेरणा दिनाचे खरे सार्थक होईल.”
वाचन संस्कृती बळकट करणारा आणि नव्या पिढीला लेखनाची गोडी लावणारा हा उपक्रम अत्यंत प्रेरणादायी ठरल्याची भावना उपस्थित शिक्षक, पालक व विद्यार्थ्यांनी व्यक्त केली.