२७ ऑगस्टच्या विशेष सभेकडे संपूर्ण शहराचे लक्ष; सचिन दगडू, नंदा कुलथे आणि सारिका हलवे यांच्या नावांची जोरदार चर्चा

२७ ऑगस्टच्या विशेष सभेकडे संपूर्ण शहराचे लक्ष; सचिन दगडू, नंदा कुलथे आणि सारिका हलवे यांच्या नावांची जोरदार चर्चा

लोकमंच टाईम्स : हरनामसिंग चव्हाण

वसमत : वसमत नगर परिषदेच्या उपाध्यक्ष पदाची निवड प्रक्रिया आता अंतिम आणि अत्यंत निर्णायक टप्प्यात पोहोचली असून, या पार्श्वभूमीवर शहरातील राजकीय वातावरण चांगलेच तापले आहे. जिल्हाधिकारी कार्यालय, हिंगोली यांच्या नगर विकास विभागाच्या अधिकृत प्रक्रियेनुसार दिनांक २७ ऑगस्ट २०२६ रोजी विशेष सभेचे आयोजन करण्यात आले असून, याच सभेत नगर परिषदेच्या नवीन उपाध्यक्षांची निवड होणार आहे.

सध्या वसमत नगर परिषदेच्या नगराध्यक्षपदी जनतेतून निवडून आलेल्या सौ. सुनीताताई मनमोहन बाहेती कार्यरत आहेत. त्यामुळे आता उपाध्यक्षपदाची माळ कोणाच्या गळ्यात पडणार, याकडे संपूर्ण वसमतकरांचे लक्ष लागले आहे. नगराध्यक्षपदी महिला नेतृत्व असताना उपाध्यक्षपदासाठी अनुभवी महिला चेहऱ्याला संधी मिळणार की राजकीय अनुभव असलेल्या पुरुष नगरसेवकाला पसंती दिली जाणार, यावर जोरदार चर्चा सुरू आहे.

अनुभवी महिलेला संधी मिळाल्यास ‘पूर्ण महिला राज’चा ऐतिहासिक योग!

वसमत नगर परिषदेच्या उपाध्यक्षपदी एखाद्या अनुभवी महिला लोकप्रतिनिधीची निवड झाल्यास नगराध्यक्ष आणि उपाध्यक्ष ही दोन्ही महत्त्वाची पदे महिलांकडे जाणार आहेत. त्यामुळे वसमत नगर परिषदेच्या इतिहासात पहिल्यांदाच पूर्णतः महिला नेतृत्वाचा नवा अध्याय सुरू होण्याची शक्यता निर्माण झाली आहे.

महिला सक्षमीकरणाच्या दृष्टीने हा निर्णय ऐतिहासिक ठरू शकतो, अशी चर्चा शहरातील विविध स्तरांत सुरू आहे. मात्र, अंतिम निर्णय पक्षीय राजकारण, नगरसेवकांची भूमिका आणि वरिष्ठ नेतृत्वाच्या निर्णयावर अवलंबून असणार आहे.

‘फिल्डिंग’ला वेग; वरिष्ठ पातळीवर शिफारशींचा पूर

उपाध्यक्षपदावर आपली वर्णी लागावी यासाठी इच्छुकांनी जोरदार हालचाली सुरू केल्या आहेत. समर्थक, कार्यकर्ते, मित्रमंडळी आणि वरिष्ठ नेत्यांच्या माध्यमातून नाव पुढे करण्यासाठी प्रयत्न सुरू असल्याची चर्चा आहे. विविध राजकीय गटांकडूनही आपल्या पसंतीच्या उमेदवारासाठी जोरदार लॉबिंग करण्यात येत असल्याचे चित्र आहे.

दरम्यान, अनुभवी, सक्रिय आणि स्वच्छ प्रतिमा असलेल्या काही प्रमुख चेहऱ्यांची नावे वसमतच्या राजकीय वर्तुळात जोरदार चर्चेत आली आहेत.

सचिन दगडू : दुसऱ्या टर्मचे नगरसेवक, गटनेते म्हणून प्रभावी भूमिका

उपाध्यक्षपदाच्या चर्चेत नगरसेवक सचिन दगडू यांचे नाव प्रमुख दावेदारांमध्ये घेतले जात आहे. ते सध्या नगर परिषदेत दुसऱ्या टर्मचे नगरसेवक असून, दुसऱ्या टर्ममध्येच त्यांच्याकडे गटनेते पदाची महत्त्वाची जबाबदारी आहे.

सुरुवातीपासूनच आमदार राजूभय्या नवघरे यांचे खंदे समर्थक म्हणून त्यांची राजकीय ओळख आहे. राष्ट्रवादीच्या संघटनात्मक वाढीसाठी आणि पक्ष बळकट करण्यासाठी शहरात त्यांनी मोठे योगदान दिल्याची चर्चा आहे. संघटनात्मक काम, कार्यकर्त्यांशी संपर्क आणि राजकीय निष्ठा या कारणांमुळे त्यांचे नाव उपाध्यक्षपदाच्या चर्चेत आघाडीवर असल्याचे बोलले जात आहे.

सौ. नंदा शशिकुमार कुलथे : प्रभाग क्रमांक ११ मधून मोठ्या मताधिक्याने विजय

उपाध्यक्षपदाच्या संभाव्य उमेदवारांमध्ये सौ. नंदा शशिकुमार कुलथे यांचे नावही जोरदार चर्चेत आहे. त्या प्रभाग क्रमांक ११ मधून मोठ्या मताधिक्याने निवडून आल्या आहेत.

त्यांच्या राजकीय आणि सामाजिक कार्याला कौटुंबिक राजकीय अनुभवाचीही भक्कम पार्श्वभूमी आहे. त्यांचे पती श्री. शशिकुमार कुलथे यांनी यापूर्वी तब्बल तीन वेळा नगर उपाध्यक्ष आणि एक वेळ नगराध्यक्ष म्हणून काम केले आहे.

वसमत शहरातील नागरिकांच्या समस्या सोडविण्यासाठी तत्परतेने धावून जाणारे, सर्वसामान्यांच्या सुख-दुःखात सहभागी होणारे आणि प्रत्येकाशी सातत्याने संपर्क ठेवून काम करणारे नेतृत्व म्हणून कुलथे परिवाराची शहरात ओळख आहे. त्यामुळे सौ. नंदा कुलथे यांना संधी मिळाल्यास महिला नेतृत्वासोबत अनुभवाची जोड मिळू शकते, अशी चर्चा नागरिकांमध्ये सुरू आहे.

सौ. सारिका दीपक हलवे : दुसरा टर्म, अभ्यासू आणि बारकाईने काम करणारे नेतृत्व

उपाध्यक्षपदाच्या चर्चेत सौ. सारिका दीपक हलवे यांचेही नाव महत्त्वाने पुढे येत आहे. त्या नगर परिषदेत दुसऱ्या टर्मच्या नगरसेविका असून, नगर परिषदेतील प्रत्येक विषयाकडे बारकाईने लक्ष देणाऱ्या लोकप्रतिनिधी म्हणून त्यांची ओळख आहे.

संवादकौशल्य, विषयाची जाण आणि आपली भूमिका प्रभावीपणे मांडण्याची क्षमता यामुळे त्यांचे नाव चर्चेत आहे. त्यांच्या पती दीपक हलवे यांनीही यापूर्वी नगरसेवक तसेच गटनेते म्हणून जबाबदाऱ्या सांभाळल्या आहेत. त्यामुळे राजकारणातील अनुभव आणि नगर परिषदेच्या कामकाजाची जाण असलेल्या नेतृत्वाची पार्श्वभूमी त्यांना लाभली आहे.

इतर नगरसेवकही इच्छुक; अंतिम क्षणी राजकीय समीकरणे बदलण्याची शक्यता

दरम्यान, वसमत नगर परिषदेतील इतर काही निवडून आलेले नगरसेवकही उपाध्यक्षपदासाठी इच्छुक असल्याची माहिती राजकीय वर्तुळातून समोर येत आहे. त्यामुळे २७ ऑगस्टपर्यंत राजकीय घडामोडींना आणखी वेग येण्याची शक्यता आहे.

पक्षीय बैठका, वरिष्ठ नेत्यांची चर्चा, नगरसेवकांची संख्या आणि अंतर्गत राजकीय समीकरणे यामुळे अंतिम क्षणी चित्र बदलू शकते. त्यामुळे उपाध्यक्षपदासाठीची ही निवडणूक केवळ औपचारिक न राहता वसमतच्या राजकारणातील प्रतिष्ठेची लढत ठरण्याची चिन्हे आहेत.

वसमतकरांना हवाय ‘विकास, अनुभव आणि स्वच्छ प्रतिमेचा’ चेहरा

वसमत शहराचा रखडलेला विकास, पाणीपुरवठा, स्वच्छता, रस्ते, नागरी सुविधा आणि नागरिकांच्या विविध समस्या सोडविण्यासाठी आगामी उपाध्यक्षांची भूमिका अत्यंत महत्त्वाची ठरणार आहे.

त्यामुळे कोणत्याही वैयक्तिक राजकीय गणितापेक्षा अनुभव, कार्यक्षमता, जनसंपर्क, स्वच्छ प्रतिमा आणि विकासाची दृष्टी असलेल्या उमेदवारालाच प्राधान्य मिळावे, अशी ठाम भावना वसमतकरांकडून व्यक्त होत आहे.

“सत्ता मिळविण्यापेक्षा शहराचा विकास महत्त्वाचा आहे. नगराध्यक्षांना सक्षम साथ देणारा आणि सर्वसामान्य नागरिकांसाठी उपलब्ध राहणारा उपाध्यक्ष वसमतला हवा,” अशी अपेक्षा नागरिक व्यक्त करीत आहेत.

आता २७ ऑगस्टच्या विशेष सभेत कोणाच्या नावावर अंतिम शिक्कामोर्तब होणार? महिला नेतृत्वाचा नवा इतिहास घडणार की अनुभवी पुरुष चेहऱ्याला संधी मिळणार? याचे उत्तर लवकरच मिळणार असून, तोपर्यंत वसमतच्या राजकारणातील ‘उपाध्यक्षपदाची खुर्ची’ चर्चेचा केंद्रबिंदू ठरणार आहे.