वसमतसह ग्रामीण भागात दमदार पावसाची हजेरी; सुकणाऱ्या पिकांना मिळाले ‘संजीवनी’चे दान!

वसमतसह ग्रामीण भागात दमदार पावसाची हजेरी; सुकणाऱ्या पिकांना मिळाले ‘संजीवनी’चे दान!

वसमत (विशेष प्रतिनिधी):
आज सकाळपासूनच वसमत शहरासह संपूर्ण ग्रामीण भागात जोरदार पावसाने जोरदार हजेरी लावली आहे. गेल्या काही दिवसांपासून शेतकरी राजा ज्या दमदार पावसाची आतुरतेने वाट पाहत होता, तो पाऊस अखेर कोसळल्याने सर्वत्र आनंदाचे आणि समाधानाचे वातावरण पसरले आहे. सलग सुरू असलेल्या या पावसामुळे विहिरी व बोअरवेल्सच्या पाणीपातळीत मोठी वाढ होणार असून सुकण्याच्या मार्गावर असलेल्या पिकांना मोठे जीवनदान मिळाले आहे.
पिकांसाठी ‘संजीवनी’; शेतकरी वर्गात समाधान
गेल्या काही दिवसांपासून पावसाने मारलेल्या दडीमुळे शेतकरी चिंतातुर झाला होता. मात्र, आज सकाळपासून सुरू झालेल्या या मुसळधार पावसामुळे पिकांना मोठा दिलासा मिळाला आहे. या पावसामुळे शेतातील उभ्या पिकांना अक्षरश: संजीवनी मिळाली असून, बोअर आणि विहिरींचे पाणी वाढण्यास मोठी मदत होणार आहे. कोसळणाऱ्या पावसाने बळीराजा सुखावला आहे.

प्रशासनाचा सतर्कतेचा इशारादरम्यान, हवामान खात्याने पुढील ३ तासांसाठी महत्त्वाचा अंदाज वर्तवला आहे.

हिंगोली, नांदेड, परभणी, जालना आणि जळगाव या जिल्ह्यांमध्ये काही ठिकाणी विजांच्या कडकडाटासह आणि मेघगर्जनेसह अत्यंत जोरदार पावसाची शक्यता वर्तवण्यात आली आहे. या पार्श्वभूमीवर स्थानिक प्रशासनाने नागरिकांना आणि शेतकऱ्यांना सतर्क राहण्याचे आणि सुरक्षित ठिकाणी थांबण्याचे आवाहन केले आहे.
आमदार राजू नवघरे यांचे नागरिकांना आवाहन
वसमत मतदारसंघाचे आमदार राजू नवघरे यांनी देखील परिस्थितीची दखल घेत मतदारसंघातील सर्व नागरिक, शेतकरी व नदी-नाल्या काठच्या रहिवाशांना खबरदारी घेण्याचे आवाहन केले आहे.
“पाऊस समाधानकारक असला तरी विजांचा कडकडाट आणि जोरदार वाऱ्याची शक्यता पाहता नागरिकांनी विनाकारण घराबाहेर पडू नये. वीज चमकत असताना झाडांखाली किंवा विजेच्या खांबांजवळ थांबणे टाळावे आणि प्रशासनाने दिलेल्या सूचनांचे पालन करावे,”
— आमदार राजू नवघरे

नागरिकांसाठी महत्त्वाची खबरदारी
विजांच्या कडकडाटाच्या वेळी मोकळ्या मैदानात, झाडांखाली किंवा विजेच्या खांबांजवळ उभे राहू नका.
नदी, नाले आणि ओढ्यांना पूर येण्याची शक्यता असल्याने पाणी पुलावरून जात असल्यास रस्ता पार करण्याचा प्रयत्न करू नका.
शेतातील वीज उपकरणांचा वापर करताना योग्य ती दक्षता घ्या.